Java fillon me rryma të ngrohta, por në fundjavë tjetër dishezë arktiko-polare në drejtim të Mesdheut.

Dekada e parë e muajit dhjetor, siç pritej, shënoi anomali të theksuara negative të temperaturës në pjesën qendër-perëndimore të Europës. Anomalitë më të forta janë regjistruar në luginën e Ronës në perëndim të Alpeve dhe kryesisht në të gjithë Francën jugore si dhe pjesën dërrmuese të gadishullit Iberik. Moti i paqëndrueshëm ka dominuar si rajonin e Mesdheut ashtu edhe Europën Veriperëndimore, në të cilën nuk kanë munguar reshjet e forta të dëborës. Pikërisht ditën e sotme reshjet e dëborës kanë prekur pjesën jugore të ishujve Britanikë, Francën qendër-veriore, Vendet e Ulta, Vestfalinë, Zvicrën si dhe Ultësirën Padane në Itali.

 

 

Në qytetin e Tiranës kjo dekadë e parë e dhjetorit mbyllet me një temperaturë mesatare prej +8.0°C e cila është 1.1°C më e ulët sesa normalja klimatike (1971-2000). Sasia e reshjeve të rëna është 119.1 mm, plot 77 mm mbi normalen dhe vetëm 0.3 mm nën totalin e muajit dhjetor. Temperatura më e ulët e regjistruar ishte +0.4°C mëngjesin e 6 dhjetorit, ndërsa ajo më e larta +13.6°C më 8 dhjetor.

 

 

Largimi i frontit polar drejt lindjes solli një rënie të lehtë të temperaturave gjatë ditës së djeshme dhe asaj të sotme. Ditën e nesërme një tjetër ciklon do të tranzitojë prej oqeanit Atlantik në drejtim të verilindjes duke kaluar mbi Francë dhe Vendet e Ulta. Ky ciklon pritet të arrijë vlera mjaft të ulta të presionit atmosferik, deri në 963 milibar dhe si rrjedhojë do të jetë i shoqëruar me erëra të forta në kuotë që do të japin efektet e tyre në të gjithë kontinentin. Në zonën veriperëndimore të kontinentit do të dominojë ajri arktiko-polar ndërsa në rajonin e Mesdheut Qendër-lindor do të ndihet prezenca e rrymave të ngrohta me origjinë Afrikano-Veriore.

Në Shqipëri java do të fillojë me mot të qëndrueshëm në pjesën më të madhe të vendit. Vranësira lokale do të sjellin reshje dëbore në lartësitë mbi 1200 metra në veri të vendit dhe mbi 1700 metra në qendër e jug. Era do të fryjë nga kuadrantët jugorë duke sjellë një rritje temperaturash. Në 48 orët në vijim ato do të variojnë nga -3°C në 6°C në zonat malore, nga 2°C në 15°C në zonat e ulta dhe nga 6°C në 17°C në bregdet. Moti deri ditën e premte pritet i butë dhe me vranësira kalimtare, të cilat mund të sjellin reshje domethënëse vetëm përgjatë natës të së mërkurës dhe orëve të para të mëngjesit të së enjtes, kryesisht në qendër dhe veri të vendit.

 

 

Evolucioni i motit deri në fundjavë.

Vendosja e lobit kanadez të Ciklonit Polar në pozicion baroklin gjatë mesjavës, do të shkaktojë një tjetër frenim zonal duke ngritur ajër të ngrohtë oqeanik në drejtim të Groenlandës. Ky impuls do të shkaktojë një valëzim të Ciklonit Polar i cili do të nisë një dishezë të rrymave të ftohta në drejtim të kontinentit Europian. Një qendër e presionit të ulët pritet të tranzitojë gjatë fundjavës prej Francës në drejtim të Mesdheut Qëndror duke sjellë edhe njëherë rryma të freskëta dhe të lagështa. Gjatë fundjavës së ardhshme moti i paqëndrueshëm pritet të rikthehet sërish edhe në vendin tonë.