Shira në fundjavë dhe rënie e fortë e temperaturave gjatë fillimit të javës së ardhshme.

Si pasojë e një qendre të presionit të ulët atmosferik në lëvizje drejt lindjes prej gadishullit Apenin, mbrëmjen e sotme, duke filluar nga ekstremi veriperëndimor i vendit, do të kemi shtim të vranësirave dhe reshje të forta. Në orët e para të së shtunës ato do të jenë të pranishme kryesisht në qarqet e Lezhës dhe Shkodrës, sidomos në zonën e Alpeve ku pritet intensiteti më i madh. Reshjet do të përhapen gradualisht në të gjithë territorin e vendit. Mesditën e së shtunës reshje shiu priten në të gjithë vendin, përjashtuar fushëgropën e Korçës ku reshjet e shiut do të jenë të pakta dhe do të bien kryesisht gjatë orëve të para të ditës së dielë. Sasi të mëdha reshjesh priten gjatë 48 orëve në vijim – rreth 100 mm në Alpe, vargmalin e Skënderbeut si dhe zonën malore përgjatë Rivierës e luginës së Vjosës. Përgjatë ditës së nesërme temperaturat do të mbeten në vlera normale ose lehtësisht mbi to, ndërsa ditën e dielë pritet të shënohet një rënie e lehtë e tyre.

Reshjet e dëborës do të bien të shtunën fillimisht në lartësitë mbi 1400 metra nga niveli i detit në veri të vendit dhe 1900 metra në jug. Pas fazës së parë pre-frontale pritet depërtimi gradual i masave më të freskëta që do të sjellë dhe një rënie të kuotës së reshjeve të dëborës. Gjatë pjesës së dytë të ditës së dielë reshjet e dëborës pritet të jenë prezente edhe në zonat paramalore në lindje të Drinit, përfshirë këtu qytetet e Peshkopisë dhe Kukësit.

Për të kuptuar evolucionin e kushteve meteorologjike gjatë javës së ardhshme është e nevojshme të zgjerojmë fokusin për analizën e figurave barike në kontinentin Europian. Vendosja në pozicion baroklin e lobit kanadez të Ciklonit Polar do të favorizojë depërtimin e anticiklonit të Azoreve në drejtim të verilindjes së kontinentit. Për rrjedhojë gjuha e ajrit arktiko-kontinental e gjendur mbi Europën qendër-lindore dhe juglindore do të “këputet” duke çuar në atë që njihet si një “cut-off” (përshtatur: izolim) i një mase të ajrit të ftohtë mbi Europën qendrore dhe veriun e gadishullit Ballkanik.

Si pasojë e këtyre levizjeve rajoni jonë do të mbetet nën influencën e rrymave të ftohta, por të thata, arktiko-kontinentale të paktën gjatë pjesës së parë të javës së ardhshme. Si pasojë e erërave nga kuadrantët veriorë pritet një rënie e theksuar e temperaturave në të gjithë territorin e vendit.

Ditën e hënë do të kemi kthjellim gradual të motit duke filluar nga perëndimi i vendit. Reshje të lehta në lindje dhe juglindje të vendit do të bien në formë dëbore edhe në zonat paramalore.  Moti pritet të mbetet i qëndrueshëm të paktën deri ditën e enjte. Në orët më të ftohta të ditës temperaturat do të jenë negative edhe në zonat e ulta të vendit, ndërsa në zonat malore dhe në luginat ku mjegulla do të jetë prezente ato do të mbeten në vlera negative përgjatë gjithë ditës.