Kushtet meteorologjike deri në fund të javës dhe një vështrim i shpejtë mbi tendencën afatgjatë.

Si pasojë e hyrjes në Europë të lobit kanadez të Ciklonit Polar i gjithë kontinenti gjendet nën influencën e masave të lagështa dhe të ftohta arktiko-polare. Efektet kryesore janë ndjerë në veriperëndim të kontinentit me erëra shumë të forta dhe reshje shiu e dëbore kryesisht në Ishujt Britanikë dhe Skandinavi. Edhe pse masa më e madhe e ajrit do të mbetet e kufizuar në veri të kontinentit, rryma të ftohta me origjinë polare do të përfshijnë për pak orë edhe rajonin tonë kryesisht mbrëmjen e sotme dhe ditën e nesërme.

Reshjet dhe vranësirat kanë qenë të pranishme gjatë gjithë kësaj jave dhe do të vazhdojnë të mbizotërojnë edhe përgjatë ditëve në vijim. Dendësia më e lartë e reshjeve do të regjistrohet pikërisht ditën e sotme gjatë orëve në vijim kryesisht në veri por edhe në qendër të vendit. Reshjet do të bien në formë shiu deri në lartësitë 900-1000 metra. Gjatë mbrëmjes si pasojë e ajrit më të ftohtë që do të hyjë në vendin tonë prej veriperëndimit, kuota e reshjeve të dëborës do të ulet ndjeshëm dhe reshje të lehta do të përfshijnë edhe pjesën më të madhe të qendrave të banuara në gjithë zonën lindore të vendit.

Gjatë natës reshjet do ti lenë gradualisht vendin kthjellimeve dhe temperaturat do të pësojnë një ulje të lehtë prej 2-3 gradësh. Dita e nesërme do të karakterizohet nga moti i kthjellët dhe era e fortë nga veriperëndimi me fortësi 5-6 të shakllës beaufort në perëndim të vendit dhe më e lehtë në brendësi të territorit.

Gjatë ditës së premte si pasojë e influencave arktiko-polare një qendër e presionit të ulët do të formohet mbi gadishullin Apenin e për rrjedhojë vranësirat do të kthehen sërish në vendin tonë. Si pasojë e lëvizjes së këtij cikloni drejt lindjes, reshjet pritet të prekin vendin tonë gjatë pjesës së dytë të ditës së premte në veri të vendit dhe gjatë ditës së shtunë në qendër dhe jug. Dendësia më e lartë i tyre pritet të jetë sërish në veri ndërsa më të pakta do të jenë reshjet në zonën e Myzeqesë. Edhe dita e dielë pritet të ketë alternim kthjellimesh dhe vranësirash lokale të cilat do të sjellin reshje kryesisht në lindje të vendit. Gjatë fundjavës reshjet e dëborës do të bien kryesisht në lartësitë mbi 1000 metra.

Pas ditës së dielë fluksi polar do të lëvizë drejt lindjes për tu riabsorbuar më pas në ciklonin polar në veri të Skandinavisë. Një ciklon i ri do të tranzitojë në zonën e detit të veriut duke favorizuar kështu rikthimin e masave anticiklonike në jug të kontinentit dhe temperaturat në rajonin tonë pritet të qëndrojnë në vlera normale gjatë fillimit të javës së ardhshme.

Situata mbetet e mjegullt në termat afatgjatë. Gjatë mesit të javës së ardhshme një tjetër ciklon në dalje nga kontinenti Amerikano-verior mund të shkaktojë një frenim të mundshëm zonal të fluksit polar në zonën e Groenlandës. Në varësi të rezistencës që do të ofrojë anticikloni termik Siberian në lindje do të mund të kemi një tablo më të qartë të situatës. Zona lindore e Europës do të mbetet për disa kohë nën influencën e anticiklonit Siberian dhe rrymave të ftohta që vijnë me të.

Tendenca për 15 ditët në vijim. Edhe pse është shumë herët për tu thënë me siguri, shumë faktorë si rikthimi i indeksit NAO (North Atlantic Oscillation) në vlera neutro-negative dhe divergjenca e vektorit Eliassen-Palm lënë të kuptohet se gjasat janë për një ndërprerje të përkohshme të rrymave oqeanike në Europë drejt fundit të muajit dhe dinamizëm të fortë të Wave 2 planetare (anticikloni Atlantik). Rrjedhimisht një konfigurim i tillë të bën të mendosh se dera mund të mbetet e hapur për impulse lindore kontinentale drejt Mesdheut Qendror (fundi i janarit/fillimi i shkurtit) por në varësi të pozicionimit të anticiklonit Atlantik skenaret për kontinentin Europian mund të jenë të ndryshme dhe nuk mbetet tjetër veçse të presim përditësimet e tjera!