Rrymat polare-detare lajmërojnë fillimin e dimrit në Europë dhe rikthimin e motit të paqëndrueshëm në vendin tonë.
Pas largimit në drejtim të lindjes të frontit të paqëndrueshëm që preku vendin tonë ditën e dielë dhe atë të hënë, rryma të ftohta ajri kanë prekur rajonin tonë. Mëngjesin e sotëm termometri në Tiranë ka zbritur në 0.9°C, një vlerë që mbetet e ulët për muajin nëntor edhe pse jemi në prag të dimrit kalendarik. Temperatura maksimale gjithashtu ka shënuar një vlerë të ulët për periudhën, 10.3°C. Edhe dita e nesërme do të fillojë me temperatura relativisht të ulëta por në vlerat maksimale do të kemi një rritje të ndjeshme me 3-4°C si pasojë e hyrjes së rrymave ajrore të lagështa perëndimore.
Situata në kontinentin Europian paraqitet dinamike. Në perëndim të kontinentit, anticikloni i Azoreve, duke u ngritur në drejtim të Groenlandës dhe Islandës, luan rolin e njohur si bllokues mbi oqeanin Atlantik duke alteruar në këtë mënyrë qarkullimin normal të Ciklonit Polar. Për pasojë lind ajo që quhet valëzim i Ciklonit Polar.
Favorizuar nga aksi i anticiklonit të Azoreve, rryma me origjinë polare detare do të zbresin në lartësi më të ulëta gjeografike. Siç mund të vihet re prej imazhit satelitor të mësipërm, falë një cikloni të pozicionuar mbi detin Baltik, në Lindje të Danimarkës, rrymat polare-detare po zbresin në këto momente drejt Europës. Të prekurat e para duke filluar prej mbrëmjes së sotme janë zona e Skandinavisë dhe ajo veriperëndimore e kontinentit.
Ditën e mërkurë, gjatë avancimit drejt jugut këto rryma të ftohta polare-detare do të kontrastohen me temperaturat relativisht më të larta të Mesdheut. Në këtë mënyrë pritet lindja e një qendre të presionit të ulët në detin Ligur në Mesdheun Qëndror me pasojë vranësira dhe mot të paqëndrueshëm. Fillimisht zona e prekur do të jetë ajo në qendër dhe veri të Italisë fqinje dhe Ballkani veriperëndimor. Avancimi drejt lindjes i këtij fronti do të sjellë mbi vendin tonë erëra të forta nga jugu dhe juglindja, të cilat do të favorizojnë reshje shiu duke filluar nga mbrëmja e nesërme kryesisht në zonën e Rivierës në jug dhe atë të Shkodrës e Alpeve në veri. Intensiteti më i lartë i reshjeve që do të përfshijnë të gjithë territorin e vendit pritet pasditen dhe natën e së enjtes duke u gdhirë e premte.
Kështu pra do të fillojë edhe dimri meteorologjik në rajonin tonë, me shira të mëdha dhe temperatura përgjithësisht në linjën e vlerave mesatare. Reshjet e borës do të mbeten të kufizuara në zonat malore dhe në fundjavë mund të prekin edhe zonat paramalore në lartësi deri në 7-800 metra, kryesisht në qendër dhe veri të vendit. Situata barike në Mesdhe do të vazhdojë të mbetet e paqëndrueshme. Ajri i paqëndrueshëm arktiko-polar do të formojë një tjetër qendër presioni të ulët gjatë fundjavës në perëndim të Italisë duke sjellë kështu shira në rajon edhe fillimin e javës së ardhshme, edhe pse këtë rradhë reshjet pritet të jenë më pak intensive në vendin tonë sesa ato të dy ditëve në vijim. Rreth mesit të javës së ardhshme mund të themi se në rajonin tonë në vija të trasha do të kemi një stabilizim të situatës meteorologjike. Gjithsesi duke parë aktivitetin e jashtëzakonshëm të anticiklonit të Azoreve në këtë fillim dimri, gjasat janë që në fundin e dekadës së parë të dhjetorit të kemi një tjetër dishezë të rrymave të lagështa dhe të ftohta në drejtim të Europës por mbetet ende mjaft herët për të diskutuar mbi detajet.